السلام!! انت من بين 20 مشارك اللي غيلتحقوا بنا فالجام المغربي الأول من أجل الريادة في سياق الانتقال
!!حنا فرحانين بزاف أنك غادي تعيش معنا هاد التجريبة
الهدف ديال هاد الپاك هو أنه يعطيك معلومات مهمة حول التنظيم، الفلسفة، و الأهداف ديال الجام
–
!مرحبا
الجام كيجمع فريق من 25 ديال الرواد الشباب اللي كايحاولو يبنيو حياة متوازنة، عادلة، و مثيرة للجميع. الجام ماباغيش يبني تحالف جديد و واعر. الجام باغي ينمي حس التشارك. باغي يساعدك أنك تدير داكشي اللي كاتدير بفعالية أكبر. باغي يربط بين النقط المتباعدة ديال مختلف المتدخلين. لأنه ماكايفكش باش يكون عندنا أحسن فكرة، كيخصنا نفهمو كيفاش ڭاع هاد الأفكار كترتبط مع بعضيتها. و باش نحسنو العالم اللي كانعيشو فيه، كايخصنا نبنيو و ننميو علاقات أكثر عمقاً
التظاهرة كتتجه لمشاركين لي هما: عندهم قل من 35 سنة، رواد فمنظمات أو حركات مهتمة بمستقبل أفضل، مرتبطين بالمنطقة، مستعدين باش يطرحوا أسئلة كبيرة، باش يتقاسمو الحقيقة ديالهم، باش يسمعو للآخر بقلب مفتوح، اللي هما منفاتحين على التناقضات، و اللي كايحلمو باش يعيشو بنزاهة. هو للناس اللي كاتدرونجيهم الوضعية ديال العالم ديالنا الحالي، و اللي باغيين يعتمدو على المجهود ديالهم باش يحسنو هاد العالم نحو عدالة و تسامح أكثر
.ناس بحالك
!ولكن ماكاينش بحالك
في الجام، كانرحبو بيك كفاعل اجتماعي، ولكن أيضاً كشخص ؛ بالقصص ديالك، و التجارب ديالك، و الحساسيات ديالك. الجام ماشي غير مساحة باش تعبر فيها على الرؤية ديالك، و لكن هو أيضا بلاصة كانتقاسمو فيها الأسئلة اللي كتئرقنا. و نتي جايا ولا جاي للجام، جيب معاك القناعات ديالك، الشكوك ديالك، المسرّات و خيبات الأمل ديالك
.مرحبا بيك كلك على بعضك كيفما كيڭولو
–
:ستة ديال الحوايج خاصك تديرها قبل من الجام
.1
تقرا هاد الپاك كامل: كنشجعوك على أنك تخصص 20 دقيقة للقراءة ديال هاد النص. بغيناك تحس بالفخر، و الأمن و النشاط لأنك جاي للجام، و هادشي كيلزّم أنك تكون عارف شنو لي يمكن ليك تنتظر من هاد التجربة. و من ناحية خرى، تقدر تبان ليك هنا شي أسئلة اللي تبغينا نجاوبوك عليها
.2
نظم الأجوندا ديالك باش تقدر تبقا الوقت كامل: حنا عارفين بأنك مشغولة أو مشغول بزاف لأنك كاتحاول تحقق بزاف ديال الأمور. عارفين كذلك أن بزاف ديال الأمور يمكن لها تبدل البرنامج ديالك، داكشي باش بغينا نطلبو منك أنك تتنظم باش تڭلس المدة ديال الجام كاملة. الجام غادي يبدا نهار الخميس 12 مارس مع 10 ديال الصباح، فتافوغالت، حدا وجدة، و غادي يتسالا نهار الاثنين 16 مارس مع ال10 ديال الصباح
3
خلي خدمتك فالمكتب ديالك: هاد الأسبوع هو مناسبة لقطع الاتصال مع الأمور اللي كتخيلك ديما مشغول البال و الوقت. هي فرصة لإعادة التركيز على راسك، و على الأمور اللي هي مهمة بالنسبة ليك، و كذلك من أجل الإصغاء للناس اللي معاك. فكنشجعوك على أنك تعلم العائلة و الأصدقاء ديالك أنك ماغاتكونش متواجد فهاد الأيام، و أنك تكون مستعد للابتعاد على الهاتف و المايل ديالك. شحال ما كنت مركز و حاضر، شحال ما غتستفد من هاد التجربة الفريدة
.4
ارتاح من قبل: حاول تستريح قبل من الجام، باش تكون واجد باش تعطي و تاخد فالأنشطة ديالك
.5
ارتاح من بعد: تقدر تبغي تاخد ليك شي نهار مور الجام باش تستوعب ڭاع الأمور اللي غاتعلمها خلال هاد الربع يام، و تستفد من داك الوقت باش تكتب فالمذكرة ديالك، تجاوب على المايلات اللي جاوك، و ترجع بالتدريج للحياة اليومية ديالك
.6
تعرف علينا أكثر: كانقترحو عليك أنك تدرب دويرة فالسيت ويب ديالنا باش تتعرف أكثر على ييس! و على هاد الجام و جامات أخرى
–
شنو خاصني نجمع؟
ـ حوايج مريحة للأسبوع
ـ درجات الحرارة كاتطيح شوية فالليل، فعول على شي حاجة سخونة
ـ سبرديلة ديال المشي/الجري
ـ معدات الحمام من فرشات الأسنان، مشطة، الخ. حنا غنوفرو الشامبوان و الصابون للجميع
ـ فوطة كبيرة و فوطة صغيرة
ـ قرعة ديال الما اللي تبقى هازها معاك – من الأفضل ماتكونش بلبلاستيك
ـ دفتر ولا مذكرة، و قلم.
ـ أي حاجة بغيت تقدمها للمشاركين الآخرين على العمل أو المساهمة ديالك.
حوايج إضافية
ـ مصورة
ـ آلة موسيقية
ـ شي حاجة من المنطقة ولا الحياة تبغي تهديها لشي واحد
–
موقع الجام
الجام غادي يكون فتافوغالت، وهي محمية طبيعية فالمنطقة ديال وجدة على مقربة من واد ملوية. فهاد المكان غادي تستقبلنا طبيعة تقريبا متوحشة، و هادا غادي يسمح لينا باش نبعدو من الصداع ديال المدينة، و نكون فمكان هادئ و نتنفسو هواء صافي. قمنا بحجز غرف فوسط المحمية، و غادي نكونو ما بين 2 و 3 ديال الناس فكل غرفة، و غادي يكون المكان مخصص للجام فقط. جميع الأساسيات، من حمام و ماء و مراحيض غادي تكون متوفرة
الأكل
الهدف ديالنا هو أنه نوفرو ليكم أكل بنين و طري و صحي المدة كاملة ديال الجام. الأكل غادي يكون مغربي تقليدي. مترددش تتصل بينا إلا كان عندك شي حمية خاصة- نباتية مثلا
الإقامة
هنا غادي نعيشو كاملين كمجتمع مصغر. من المهم أن كلشي يشارك فامتلاك هاد المكان و المحافظة فأحسن حالة. الفراش و الغطا غادي يكون متوفر، ولكن يمكن لك تجيب التلميطة أو الغشا ديالك إلى بغيتي
–
توافق
.كاين جوج ديال الحوايج اللي كانطلبوها من ڭاع المشاركين باش نحققوا الراحة و الأمن ديال الجميع
.1
ماتجيبش معاك أي مخدرات ممنوعة أو كحول. بغينا نوفروا إطار من الأمان و الانفتاح في هاد التظاهرة، و بغينا نشجعو الجميع باش يكونوا حاضرين و خدامين مع بعصياتهم. لهاد السبب، مابغيناش تكون عندنا أي مواد اللي يمكن تأثر على الأفكار و التصرفات ديالنا
.2
السرية. كانطلبوا من كل واحد أنه يحافظ على السرية ديال ڭاع الأمور اللي كايتقاسموها معانا المشاركين من حياتهم و أفكارهم الشخصية
–
الوصول لمكان الجام
فوقاش نجي/نمشي؟
غادي نتلاقاو فوجدة نهار الخميس 12 مارس فالعشية مع الستة. مكان اللقاء غيكون محطة القطار ديال وجدة. تماك، غتلقاو الفريق المنظم فانتظاركم باش نمشيو جميع لموقع الجام
غادي نساليو الجام نهار الاثنين 16 مارس مع ال12، و من تما غادي نمشيو الوجدة باش كل واحد يمكن لو يرجع حسب البرنامج ديالو
معلومات حول السفر
عفاك سيفط لينا المعلومات ديال السفر ديالك، فوقما قديتي، خاصة ساعة و يوم الوصول باش نقدرو ننظمو المركوب من وجدة لتافوغالت. يمكن لنا نرصيو معاك هاد الأمور عبر الإيمايل فأي وقت
:كاين جوج ديال الامكانيات باش توصل الوجدة
ـ التران: كاياخود ستة ديال السوايع من فاس، و كاين ثلاثة ديال التوقيتات فالنهار، يمكن ليك تشوفهم فالموقع ديال المكتب الوطني للسكك الحديدية
ـ الكار: و مدة السفر 4 ديال السوايع من فاس (كاين الطريق السيار). كاين بالخصوص الستيام اللي كايجي لوجدة 3 ديال المرات فالنهار
.الفريق المنظم غادي يتكلف بالنقل من وجدة لتافوغالت
–
–
فلسفة و مبادئ الجام
جام هو فرصة باش الواحد يكبر فبزاف ديال المستويات: كشخص، كعضو فالجماعة ديالو، و كفاعل فالنظام اللي كيحيط بيه. على المستوى الشخصي، الجام هو مناسبة باش نفكرو، باش نبراو، و نتعرفو كتر على ريوسنا. على المستوى الجماعي، الجام كيلاقينا بناس كتشترك معنا فالطموح المشترك ديالنا، باش نتعلمو منهم و يتعلمو مننا و نطورو الطريقة لي كنتواصلو بها مع بعضيتنا: نسمعو للآخر، نقدمو لو الدعم و الحب اللي محتاج ليه. و الجام كايخلينا نفهمو حسن شنو هي الرؤيا ديال كل واحد فينا كفاعل (جمعوي، علمي، سياسي، فني، الي كان)، و كيفاش يمكن لكل واحد فينا يوصل لداكشي لي كيحلم به، فواحد الاطار ديال التوازن و تحقيق ذات
كنقدرو التنوع ديال المجتمع المغربي ديالنا و بغينا نخلقو واحد المجال لي يمكن لهاد التنوع أنه يولي تفاهم و تواصل. انطلاقا من المبادئ ديال الاحترام المتبادل و التقدير المشترك، “الجام” كيفسح المجال لكل واحد أنه يعبر على راسو و يتعرف على راسو بكل حرية و يلقى فالمقابل الدعم و التقدير ديال الناس الاخرين. بمعنى آخر، الهدف ديال الجام هو أنه يجمع شباب فاعل و خلاق باش يعاونهم فالمسار الشخصي ديالهم، و يعطيهم واحد المنظور جديد على الاشكاليات اللي كايواجهوها فحياتهم الشخصية و المهنية
هاد التظاهرة كتتبنى نظرة كليّة للتغيير الاجتماعي، و كاتآمن بحال غاندي بأننا خاصنا نكونو التغيير لي بغيني نشوفو فالعالم. كانقلبو على مشاركين اللي كاينميو نفوسهم و كيساهمو فعليا فخلق تغيير إجابي على ثلاثة ديال المستويات متكاملة: الداخلي، البيني، و المجتمعي. كنآمنو بأنه الشخصي و الاجتماعي مرتبطين بقوة، و بالتالي، هاد الجام كيمثل استكشاف لحياتنا الشخصية و عملنا المشترك نحو عالم أحسن. كيخلق مجال للمشاركين من أجل اختبار العمل و الاسهامات ديالهم، و لكن أيضاً قناعاتهم، و قيمهم، و مشاعرهم ـ و هادشي فواحد السياق ديال الاحترام و الثقة ليكسمح بنشأة رؤى عميقة و فهم متكامل
القلب ديال الخدمة ديالنا هو أننا نخلقو هاد الفضاء اللي يخلي الرواد الشباب يبنيو علاقات و جسور ديال التضامن و الصداقة و شراكات نحو عالم عادل و دائم. بنسبة لنا، الصداقة هي أساس الحركات القوية ديال التغيير الإجابي
.1
جميع الإشكالات مرتبطة: الجام مكيركزش على مشكل أو فكرة وحدة
.2
الوصل بين النقاط: باش نبنيو شبكة متكاملة
.3
الاستقلال: القناعة بأنه كان ما يكفينا، و بأننا كافيين لريوسنا و لبعضيتنا
.4
الحكمة الداخلية: من أجل إعادة الارتباط بالشخصية ديالنا و القيم ديالنا
.5
المجتمع مبني على أساس الاحساس بالأمان و الثقة: و هي جوج ديال القيم أساسية
.6
فن العصير: بالنسبة لنا العصير مع أشخاص منخرطين بحالنا في التغيير هو اللي غادي يسمح بخلق فريق من الرواد و قوي اللي كل واحد يقدر يعتمد عليه و يستمد منو التشجيع و المساندة اللي يحتاجها
.7
اللاعنف: اللاعنف هو احسن استراتيجية من أجل مواجهة الخوف، و الطمع، و العنف اللي متفشي فالعالم ديالنا
–
–
تعرفو على المُسَهِلين
شيلبا جاين عايشة حالياً فأوكلاند، كاليفورنيا. هي المديرة التنفيذية ديال منطمة ييس! قبل من هادشي، شيلبا دوزات عاماين كمكلفة بالتعليم و التواصل فمنظمة “عوالم أخرى”، و عشر سنين كفاعلة فمنظمة “شيكشانتار” و هي منظمة شعبية لإعادة تعريف التعليم و التنمية فالهند. شيلبا كتبات و ساهمات فبزاف ديال الكتوبة و البحوث
–
نورالدين الخطابي (26 سنة) شاب مغربي و فاعل جمعوي، تلقى التعليم ديالو فمجال العلاقات الدولية. هو كيهتم بالخصوص بمجال التعليم، حقوق الانسان، الديبلوماسية الشعبية و الادماج الاجتماعي ديال الشباب و الأطفال اللي عايشين فالكاريانات ديال الدارالبيضاء. حالياً، نور هو رئيس منظمة شبابية سميتها جمعية الأحياء إدماج، و نائب المدير ديال المركز الثقافي ديال سيدي مومن. هو أيضاً مناضل من أجل حقوق الانسان، و عضو المكتب الوطني ديال منظمة العفو الدولية فالمغرب
–
علياء الحلو (25 سنة) كبرات فإفران و من ديما و هي كاتسافر من بين بلايص مختلفة، بحثاً عن التعلم و الانسلاخ من التعلم، النمو، و الحب. عندها شهادة ماستر فالعلاقات الدولية، و لكن تعلمت ڭاع داكشي لي كتعرفو خارج المدرسة. علياء عايشة حالياً فنيويورك و كتخدم فموقع “إيدياليست.كوم”، و هو واجهة كتهدف لسد الثغر بين النوايا و الأعمال من خلال ربط الناس، المنظمات، الأفكار، و الموارد. عندها بزاف ديال الأفكار و المشاعر، و الوقيتة المفضلة ديالها فالعام هي الجام، اللي كايسمح لها بالتعمق فيهم مع جماعة واعرة
–
يوسف بناصر(24 عام) كيموت على واحد الحاجة سميتها الاقتصاد. بالنسبة ليه، هو وسيلة من أجل فهم واقع الموارد ديالنا، و أحسن طريقة باش نستمعلهوم و نفرقوهوم بيناتنا بعدل، و في احترام للاحتياجات ديال غيرنا و ديال الناس اللي غايجيو بعد مننا. حالياً، يوسف كيهتم بالمالية العمومية و كيخدم كمساعد بحث لمتخصصين فهاد المجال. الهدف ديالو هو أنه يساهم فتصور نظام مختلف للتسيير و ترشيد الثروات من أجل تقديم خدمة عمومية فعالة و ناجعة للناس، بالخصوص على المستوى المحلي. أكبر مشروع ديالو حالياً، بعد الجام، هو يتعلم يلعب العود حيت عزيزة عليه الموسيقى الشرقية بزاف
–
سمية مغنوج (24 عام) كبرات فالرباط و هي دابا عايشة فباريس. هي مهتمة بالتعليم، و كتتمنى أن ولوجية تعليم من جودة عالية تتحسن فالمغرب. هي دابا خدامة فمنظمة التعاون الاقتصادي و التنمية على سياسة التعليم و الإصلاح ديالها. هي براسها مازالا متعطشى بزاف لأنها تتعلم حوايج جداد و باستمرار . سمية كتمآمن بأن التغيير الاجتماعي يمكن ياخد بزاف ديال الأشكال، و هي كتحاول أنها تستكشف طرق مبتكرة اللي تساهم فبناء مجتمع دائم الحركية و صحي. فاتلها شاركت فعدد من الجامات، و نظمت حلقة مماثلة مختصة بالنساء فشمال المغرب العام اللي فات
–
ابتسام لشڭر (39 عام) من مواليد الرباط، كبرت تما، قبل ما تمشي تكمل قرايتها فباريس. اختصاصية فعلم النفس المرضي و العيادي، و مناضلة فمجال حقوق الانسان و الحريات الفردية، كتعيش حياتها ما بين الرباط و باريس، والنضال ديالها كيجعلها تسافر بزاف حول العالم. كتوافق بين الخدمة و لاكتيڤيسم ديالها من خلال ممارستها للمهنة ديالها فالإطار الجمعوي و الإنساني. هي كتطمح لتغيير دمقراطي حقيقي فالمغرب و فغيرو ديال البلدان، فاحترام الحرية و الحقوق ديال كل واحد، وفي إطار من الكرامة و العدالة
—
!!و سي يو سوون
—
Pour obtenir les informations logistiques en français/anglais, prière de nous contacter sur moroccojam2015@gmail.com